Thu. May 23rd, 2019

Bafu ba 13 ba kotsi ea tekesi ba tl’o tsejoa

KABELO MASOABI

MASERU – Moqhobi oa koloi ea BMW ea belaelloang e le sesosa sa kotsi ea makoloi Foreistata e nkileng maphelo a Basotho ba 14, a ke ke a hlola a tseba mahlomola ao a sietseng beng ka bafu.

’Melaeloa eo e leng letsoalloa la Afrika Boroa, ’me eo Mosotho e nang le mabitso a hae, o timetse ’moho le baeti ba Lesotho ba 14 nakong eo makoloi a mararo a thulanang sa lipheleu ’mileng oa R26 o lipakeng tsa Bethlehem le Foureisburg ka Moqebelo o fetileng.

Motlatsi oa Letona la Lekala la tsa Lehae, Halebonoe Sets’abi o hlalosoa a tlalehile ha ba malapa a bafu le baamani ba bona ba tla etsa liteko tsa maro a mang a ’mele (DNA) a tla bapisoa le a bafu hore bao ba timetseng ba tle ba tsejoe, kaha ba chele hoo ba kekeng ba hlalohangoa.

Sets’abi o hlalosoa a boletse hore moifo oa matona a Lesotho o bile oa romeloa sebakeng sa kotsi ho hlahloba botebo ba eona.

E mong oa baqhobi ba litekesi tse peli tse amehileng kotsing ena Thabiso Phiri, 35, ho ea ka tlaleho ea leselinyane le leng la Gauteng, o re eena o ne a qhoba e ka pele ha ho tla hlaha koloi ea moetso oa BMW e tla e tobile ho ea hae ka lebelo le ts’abehang, mothinyeng o kotsi.

Ke moo Phiri a reng o ile a leka ho e qoba empa koloi eo ea thula ea hae lehlakoreng, ea nt’o fetela ho e neng e tla kamorao ea moetso oa Toyota Quantum.

O re BMW le Quantum li le tsa nkana sa lipheleu, ’me Quantum e aba ea cha lore!

Baeti ba 13 neng ba le kahar’a Quantum ba ile ba cha lore le eona, ha ba bang ba bahlano bona ba amohetsoe lipetlele tse haufi ka maqeba a mabe a ho cha.

Phala ea Sepolesa sa Foreistata Hillary Mophethe phatlalatsong ea sepolesa o hlalositse ha mofu e mong ea neng a palame tekesi e neng e le ka pele ho Quantum a timelletse sepetlele e le eena ea ileng a tsejoa ka potlako.

Please follow and like us:

Leave a Reply

Your email address will not be published. Required fields are marked *

Wordpress Social Share Plugin powered by Ultimatelysocial