Tue. Aug 20th, 2019

Ma-ABC a amohela Mahao ka nku

KABELO MASOABI

LERIBE – Motlatsi oa moetapele oa Kobo-Tata ea Basotho (ABC) o tlohile Hlotse ka Sontaha a kiba-kiba ka mpho ea nku kamor’a hore sechaba sa moo se mo amohele ka thabo e kholo.

Professor Nqosa Mahao eo komiti ea habo e-so ka e hlohonolofatsoa ho tsoelapele ka ts’ebetso o ne a ts’oere seboka sa mokha Hlotse, Lisemeng II ka Sontaha.

Leha hole joalo, nku ena Mahao o boetse a e fetisetsa Matsieng, Maseru moo a itseng e lebisoe lapeng la mongoli oa lekalana la moo eo eleng mofu, e le mats’eliso a tsoang ho Ma-kobo-tata.

Mofu o ile a timela le ba bang kotsing ea koloi bekeng ea ho feta, ha Ma-ABC a ne a etsoa sebokeng Mohale’s Hoek.

“Nku ena leha ke e thabetse hakana, ke kopa hore ke e fetise e le mats’eliso a bonts’ang hore Makobo-tata ke tlama-thata e ts’ehetsanang le nakong tsa mathata. Re ts’elisa lelapa leo ka tahlahelo eo e bohloko ruri,” a rialo Mahao.

Makobo-tata a neng a le sebokeng moo, a hlalositse ha a se a nkile Mahao e le eena moetapele oa bona kaha moetapele oa ABC Motsoahae Thabane a ba phoqile.

Please follow and like us:

Leave a Reply

Your email address will not be published. Required fields are marked *

Public Eye Social Media  powered by Ultimately social