Masole a rahaka mosali ka lirifi

Napo Lekhooana

MASERU –Banna ba bararo bao e leng litho tsa Sesole sa Lesotho ba qosoa ka ho raha mosali ka bothong, le ho mo teteka ka sepheo sa ho mo ntša likotsi. Lekhotleng la ’Maseterata Maseru Lekhooa Moepi (50) oa Ha Thetsane, Liphapang Sefako (48) oa Ha Thetsane Maseru le Simon Rabonne Zwakala (46) oa Ha Matala Maseru ba qosoa ka ho hlekefetsa hampe se seng sa litho tsa Sesole sa Lesotho Private Ntšiuoa Molapo.

Bekeng e sa tsoa feta, nyeoe khahlanong le baqosuoa e hlalosa ha boraro bona boo ebileng e le litho tsa Military Intelligence, ka nako e lipakeng tsa la 13 le 16 Tšitoe 2012, pela meaho ea Sesole sa Lesotho e Ha Ratjomose Maseru, bo otlile ’melaeli le ho mo raeaka likarolong tsa botho. Pampiri ea qoso e hlalosa baqosuoa ka sepheo le morero ba ile ba otla ’melaeli hohle ’meleng ba sebelisa sebetsa sa ho shapa, ’me ba qetella ho mo ntša likotsi ’meleng.

Kamor’a hore lekhotla le hlokomelise baqosuoa tokelo ea bona ea beile, ’muelli oa Moqosuoa oa pele Akhente Letsika o ile a kopela moqosuoa ho lokolloa ka beile. Akhente ea supa moqosuoa e le setho sa sesole se ntseng se le tšebetsong. A re moqosuoa eo ke monna oa lelapa ea nang le ngoana le mosali bao nako eohle ba phelang ho tsoa ho eena. O re baqosuoa haesale ho tloha ho thomeheng hoa nyeoe, esale ba ntse ba ikobela le ho ikamahanya le litaelo tsa lekhotla.

A supa hore ka mabaka ao, seo ke tiisetso ea hore baqosuoa ba tla lula ba fumaneha nako eohle ba bitsoang ho ikarabella. Mochosisi Tshabalala a hlaha ka hore haho khanyetso ea letho ea hore baqosuoa ba ka lokolloa ka beile, ba nto lokolloa. ’Maseterata Litlhare Rantšo a fa baqosuoa ho hlahella lekhotleng ho tla balloa qoso ka la 25 Phuptjane.

Default Basic Success warning Info Danger Primary

Related Posts you may like

Popular Post