Ngaka e memela metsofe lefu

KABELO MASOABI

THABA-TSEKA –Moshanyana oa molisana (17) oa Ha Tlai-Tlai o re ke ngaka ea setso e mo bolelletseng hore maqhekoana ao a a fenethileng, a loile bo-abuti’ae ha ba tla shoa.’Melaeloa enoa eo sepolesa se lumelang a entse lipolao tseo tsa banyalani ba metsofe le banna ba bang ba babeli ba Qoqolosing, baholoane ba hae ba tlalehoa ba timelletse merafong ea Afrika Boroa.

Bafu e leng monna-moholo (75) le mohats’ae (65) ba fumanoe katlung ke ngoana oa moaisane kamor’a hore metsofe eo e se bonoe ka matsatsi a baloang ’me ngoana h’a tla bona sebonoang, o ne a laetsoe ke batsoali ho ea hloela hore na bao ba ntse ba le teng ka ntlong eo ea bona.Boraro boo bo nkhang lefotha lipolaong tseo ba litlamong tsa sepolesa moo ba tlalehoang ba emetse ho ea hlaha khotla ha lipatlisiso li phethetsoe ho ea ka Phala ea sepolesa Superintendent Mpiti Mopeli.

Sepolesa se re ho rena boemo bo nyarosang ka har’a naha ba metsofe e mengata e fenetheloang matlong a bona ka pelaello ea boloi ’me litloholo e sale e le likhutsana-khulu.Mobali a ka hopola har’a tse ling ketsahalo eo monna ea lilemo li 30 ea bolaileng mosali-moholo ea lilemo li 71 ka ho mo nyekenya ka thipa ka makhetlo a mabeli mpeng sebakeng sa Mphaki, Quthing, a re mofu ke moloi o bolaile ntat’ae ka ho mo loea.

Athe ketsahalong e’ngoe mosali-moholo ea lilemo li 87 o ne a retloe Ha Motloheloa, Qacha’s Nek a fumanoa a khaotsoe hlooho le letsoho.Pelaelo ea sepolesa ka molaoli oa sona seterekeng seo sa Qacha ka nako eo, Senior Superintendent Moshe Raleting o ne a supe ha mofu a retliloe ka selepe e le motšeare letsatsi le chabile. “O hlokometsoe ke moahisane ea neng a chaketse mofu h’a tla fumana setopo sa hae se sesa ka har’a letamo la mali,” a na rialo.

Mobali ea khathatsehileng Mofumahali ’Mantsoaki Koloti o re liketsahalo tse kang tsena ke tse ling tse pakang hore maqhekoana a tlokotsing ea ho hlekefetsoa le ho bolaoa ka bobebe ka ha hangata a lula a le mang kapa le bana ba banyenyane ba siiloeng ke batsoali ba il’o fata metsuntsunyane hole. O re bothata bona ke kobo-anela ea Afrika haholo linaheng tsa batho ba lumelang ho boloi joaloka Basotho ba bangata leha makhotla a molao mona a sa chochise litaba tsa boloi hobane li hloka bopaki.

Linaheng tse ling mohlala: ke basali ba maqhekoana ba fetang leshome ba tlalehoang ke phatlalatso ea AgeAfrika ba bolauoe ba qosoa ka boloi naheng ea Malawi ho tloha ka Pherekhong, monongoaha.A mararo a ile a pholosoa ke sepolesa kamor’a hore matlo a bona a chesoe ke karolo ea sechaba se ba khomaretsang ho sesosa sa mafu a hlahileng motseng. Zambia, Zimbawe, Afrika Boroa, Mozambique le linaha tse ling ha se mokhelo qakeng ena holatela litlaleho tsa phatlalatso ena.

Default Basic Success warning Info Danger Primary

Related Posts you may like

Popular Post