…basebetsi ba hopola mantsoe ao

Thabane h’a behele lehe

KABELO MASOABI

MAPUTSOE – “Le mpatla lehe ke se khoho.”
A na ke mantsoe ao mosebetsi oa feme ea liphahlo e Ha Nyenye a reng basebetsi ba lifeme b’a hopole leha e le mona Tona-Kholo a tšepisitse ho imamella kopo ea bona ea ho nyolleloa meputso. Mofumahali ’Mamoroesi Mokebe o re mantsoe ao ke a sa lokelang ho lebaloa habobebe kaha a ne a hle a hlakisa sebopeho sa Tona-Kholo (Dr Motsoahae Thabane), h’a ne a a bua kamor’a ho khethoa le ho fuoa marapo a puso ke bona basebetsi bao ka 2012.

Mokebe ea tsebahalang har’a basebetsi ka ho hlahisa maikutlo a hae a sa qekise motho, o re Thabane o ne a bue joalo leha a se a itšoasolla tšepisong eo a neng a e etsetse basebetsi bao ha a ne a batla ba mo khethe, a re h’a ka nka puso o tla ba fa moputso oa M2, 020 empa ha ba se ba e batla, a re ba tseka ho eena ka phoso kaha e se eena ea hirang basebetsi bao ‘ba ’matla lehe e se khoho’.

Hajaole, kamor’a hore puso e neng e etelletsoe pele ke Thabane e oele ka 2015 le hore a khutle sekoele ngoahola, basebetsi ba se ba kopa nyollo ea linoko tse 15 (15%) hore ho fihleloe meputso e phelisang. Ho teng basebetsi ba kholang M1, 000 e le moputso o ka tlaase lifemeng tse ling hajoale.

E mong mosebetsi ‘Manyakallo Seoma o tlatsana le Mokebe o re setsung ke Ha Molapo, ha ho nyollo eo basebetsi ba tla e fumana haholo ha Letona la Lichelete Dr. Moeketsi Majoro, a sa tsoa hlalosa hore ’muso o haelloa ke chelete haeba ho ne hothoe o ka tlatsetsa, boemo boo a hlalosang bo bakiloe ke puso e fetileng ea makhotla a K’honkrese ka ho sebelisa hampe chelete ea sechaba tlas’a maano a bobolu.

Bekeng e fetileng Maseru, basebetsi tlas’a keta-pele ea mekhatlo ea bona ea basebetsi ba ile ba tšoaroa mokoloko oa boitseko ho lebisa lengolo la litletlebo ho Thabane ea ileng a le amohela ka ho supa h’a tla imamella lona ka matsatsi a 14, a nt’o ba fa likarabo.

Default Basic Success warning Info Danger Primary

Related Posts you may like

Popular Post