Mora o hlekefetsa ’m’ae

Ka Napo Lekhooana

MASERU – Lekhotleng la Mathomo Maseru monna o qosoa ke ’m’ae le ngoan’abo ka tšenyo ea thepa le ho ba bitsolla ka mahlapa a tala. Sechaba Kobile (25) oa Ha Tsolo, Maseru, o emetse nyeoe a le ka banneng ka ho senya lemati la ntlo ea bo (ea ’Masechaba Kobile), le ho nyaea-nyaea ’m’ae ’Masechaba Kobile le Lebohang Kobile ka mahlapa.

Moqosuoa o entse sena letsatsi leo a neng a qeta ho fuoa kahlolo hona lekhotleng leo, le bile le mo file monyetla oa ho tsoela kantle. Lekhotla le ne le qeta ho mo fa taelo ea hore a tsoe, empa a nke bonyane likhoeli tse peli a sa etse phoso. Leha ho le joalo, moqosuoa hang hoba a fihle hae o ile a feresa, a rohaka eo ngoan’abo Lebohang le ’m’ae ka mahlapa a tala a ba a qetella ka ho roba lemati la ntlo ea ’Masechaba.

Letsatsing le hlahlamang moqosuoa a boela a khanneloa lekhotleng ke sepolesa kaha a ile a tlalehoa hang teng. Kamor’a hore moqosuoa a ipolele a se molato, lekhotla le ile la mo hlokomelisa hore o na le tokelo ea ho ipatlela leqoetha. O ile a kopa ho fuoa nako ea ho batla akhente empa a ema le monn’a mateneng ha lekhotla le re o tla lokela ho lefa beile a tla tsebe ho lokolloa kapa a emele nyeoe a le chankaneng.

Hang hoba a hlokomelisoe joalo moqosuoa a re o tla ipuella nyeoeng eo. Ke moo Mochochisi ’Mammuso Mokete a ileng a kopa lekhotla ho chechisa nyeoe eo kaha a ikholisitse hore e mong oa baqosi, eleng ’m’e oa moqosuoa a sena bophelo bo botle joale a sa tla lekhotleng. A kopa lekhotla ho se lokolle moqosuoa kaha a bonahala a le hlaha bathong bao a phelang le bona. Ea neng a etelletse nyeoe pele, Mohlomphehi Pulamaliboho Sekonyela, a re nyeoe e tla tsoela pele letsatsing le seng le kopiloe ke ba bochochisi.

Default Basic Success warning Info Danger Primary

Related Posts you may like

Popular Post