Basebetsi ba rapella mokholo

KABELO MASOABI

MAPUTSOE – Basebetsi ba lifeme ba seng ba qetile matsatsi a mararo ba sa kene mosebetsing, ho tloha bekeng e fetileng, ba etsa thapeli e sa feleng ea hore mohiri a be pelo-hlomohi ho lefa meputso ea bona e felletse. Basebetsi bana na le letsoalo la hore ba ka ’na ba qotheloa chelete ka hore mohiri a bale matsatsi ao ba theohetseng ka oona e be o lefa ao feela kaha ba ile ba nyahlatsa mosebetsi, ba kena boitsekong ba ho nyolleloa meputso.

Ba boetse ba bang ba bontša ba ikoahlaha ka ho kena boitsekong bo seng molaong e leng boemo bo ka susumetsang mohiri ho ba leleka kapa ho ba chehela maraba a ho ba nyaola ka le reng ba bapalla mosebetsing. Kellelo Monyake, Tšepang Koteli le ’Matiietso Molati ke basali ba khathatsehileng ba qoqileng le Mosotho ka Labone ba le kantle ho feme eo ba sebetsang ho eona. Letsatsing leo feme ha e’a ka ea ba bulela mamati ho kena ho ea sebetsa joaloka mehla leha ba ne ba ikemiselitse joalo.

“Kajeno boitseko bo khinne hobane ke letsatsi la ho mameloa hoa nyeoe Maseru koana, eo bahiri ba e hlahletseng ba thibela ho phatlalatsoa hoa K’hasete e reng basebetsi ba lefshoe M2,000 ka khoeli e le moputso o tlaase. Re ne re lebelletse hore re tla hatisa chelete ea letsatsi lena kaha ho se boitseko empa mohiri o re koalletse kantle,” eo ke Koteli.

Basebetsi ba kholang kamor’a libeke tse peli ba re ha ba tsebe se tla etsahala mafelong a beke ena joalokaha e le mafelo a beke ea ho khola. Ka tsela e tšoanang le ba fumanang meputso ha khoeli e oela ba letsoalong. Mosotho e hlotsoe ho fumana maikutlo a bahiri lifemeng tse peli tse kholisang basebetsi mafelong a beke ena kaha balebeli ba hlile ba latola ho kena hoa mang kapa mang lihekeng tsa feme.

“Hosane ke letsatsi leo re le lebelletseng ka tjantjello e kholo hobane ho tla fanoa ka qeto ke Lekhotla le Phahameng. Leha ho le joalo re’a ipotsa hore na bahiri ha ba tl’o re fokotsa e le hore ba tsebe ho ’na ba lefa chelete e tšoanang ha ba ka laeloa ho re nyollela ka chelete eo e ’muso o e khothalelitseng,” ho touta Monyake.

Basebetsi ho tsoa lifemeng tse ngata ba ile ba bonoa ba khutlela mahae mesong ea Labone ha ba bang ba hlile ba laeloa ke bahiri ho lula hae letsatsing le etellang leo pele. Litaba li sae me joalo, ‘muso le baetapele ba mekhatlo ea basebetsi ba ile ba bolela mafelong a beke hore li tla tsoa li sae me ka lijoko e le hona hore khalefo e bonahetseng ho basebetsi eke e kokobele le hona hore merusu e neng ese e jele setsi e qhalehe.

Tebello ke hore mosebetsi oa lifeme o tla boela o buloa ka Labobeli bekeng ena, kamor’a phatlalatso eo e kopanetsoeng. Litaba tsa nyeoe le tsona li ile tsa chechisoa ka le reng maqoetha a macha a bahiri a sa ilo ithuta nyeoe kaha ba neng ba e etelletse pele eka ba se ba iphile limenyane kapa ba chele ntši ka le reng ho bile le litšoso maphelong a bona le ba-malapa a bona.

Default Basic Success warning Info Danger Primary

Related Posts you may like

Popular Post