Tšireletso e tl’aba e matla setsing sa mabankele

Lerato Buthelezi

MASERU - Poboli e ileng ea bonahala ho Basotho ba bangata ba sebeliang setsi sa mabenkele a Maseru Mall, ea hore hona le batho ba bonahalang ba tsoile letšolo ho ba senyetsa le hona ho ba utsoetsa makoloi a bona, e bonahala e tla ea meriting kaha botsamaisi ba setsi seo ba hlalosa bo tla nka taolo ka mokhoa tšireletseho e matlafetseng.

Ha a bua Motsamaisi oa setsi seo, Monghali Baholo Chimombe, o hlalositse hore ke boikarabello ba bona ho bona hore bareki bohle ba eang setsing seo ba ea bolokeha ho kenyeletsa le thepa ea bona. A hlalosa hore hona joale ba bopile khokanyana phiri le Sepolesa sa Lesotho ho kenyeletsa le Kh’ampahani ea tšireletso ea G4S, ho bona hore ba koala likheo tseo ebang ba ne ba sa bone hore na batho ba utsoetsoa joang. A boela a hlalosa hore G4S e lula e potoloha khafetsa hona setsing seo.

“Re keke ra iphapanyetsa taba ea hore ho bonahala hona joale bosholu bo le hohle ka hare ho sechaba sa rona. Hona joale ka hare ho setsi sa rona re na le mapolesa a mararo feela ho kenyeletsa le batšireletso ea G4S hoo e leng palo e nyanyane haholo ho latela batho ba bangata ba lulang ba ea mabenkeleng moo le litšebeletsong tse ling”, a rialo Chimombe.

A tsoela pele ka hore setsi seo ke sa Basotho. A re ka hare ho mabenkele a 76, a 31 ke a Basotho, ‘me ke tokelo ea Mosotho e mong le e mong hore a ka reka mabenkeleng a bona ho sena ntho eo a e tšohileng. A re ba bang ba baetsi ba litlolo tsena tsa molao ke batho ba sa tsejoeng ha ba bang bona ba tsebiloe ba bile ba se bale litlamong tsa sepolesa, ‘me ba rerile hore ba hlahise lifahleho tsa bona hohle hore batho ba ba tsebe.

Ha a bua lebitsong la Sepolesa sa Lesotho Sub Inspector Lefu Thaele o ile a hlokomelisa Basotho hore ba hlokomele hore makoloi a bona a koalehile hantle pele motho a ka kena ka mabenkeleng. A boela a hlalosa hore motho e mong le e mong ea bonang ntho e sa tloalehang a e tlalehe hang hang.

Basotho ba ‘maloa ba se ba ile ba utsoetsoa makoloi a bona nakong eo ba ileng mabenkeleng moo ke batho ba sa tsejoeng. Har’a bona ba bang ba lehlohonolo ba ile a atleha ho a fumana ha ba bang le ho fihlela hona joale ba eso fumane hore na koloi tsa bona kapa lithepa li nyameletse kae.

Default Basic Success warning Info Danger Primary

Related Posts you may like

Popular Post