Mohlankana o shoella bonyatsi

KABELO MASOABI

MATUKENG - Mosotho o’a ba opile khomo lenaka h’a re matsatsi a ho utsoa a mangata empa la ho tšoaroa le leng.Le fetse la chabela mohlankana ea lilemo li 26 oa Thaba-Tseka ea bolauoeng ka matsoho haufinyane ke monna oa mosali eo a neng a chuchuntha le eena ha eo mon’ga ntlo a le sieo.

Tlhaloso ea sepolesa e re monna ea bolaileng, ea litlamong tsa sona ha joale, o fihlile ha hae a sa lebelloa eba o fumana mosali oa hae a koalletse ‘mokhotsi eo ea hlabisang lihlong’ joalokaha linyatsi li tloaetsoe ho bitsoa joalo. Ho ileng hoa latela kamor’a hore mosali a thatafalloe ke ho bulela monna oa hae lemati, tlhaloso e re monna o bile le pelaelo ’me a qetella a pshatla fenstere a itšohlometsa katlung. Hang ho ba a khahlane le nyatsi ea ba ese e le ua mpona ka u bona, hoa kupa ntoa e ileng ea imela nyatsi ho fihlela e nehela moea.

Ho sa le joalo, ketsahalo e tšoanang e kile ea tlalehoa Maputsoe leha li fapana ka hore ho ena nyatsi e ne e bolae monna oa mosali.Bona ho utloahala ba ne ba se ba lula ’moho ka bolokolohi kaha monna a ne a qeta nako e telele a le mosebetsing merafong ea Afrika Boroa ’me a tloaetse ho bolella mosali oa hae nako eo a tla tla hae ka eona.

“Ka mohlolo, mohla letsatsi leo le mahlonoko monna o fihlile a sa rerisa mosali joale a fumana nyatsi ka ha hae e le bosiu ho robetsoe. Ntoa e ileng ea tlola e ile ea hlola mong’a mosali, nyatsi ea mo fenethela mosali oa hae,” ho hopola Mofumahali Ngatane Mahoko oa Mohalalitoe moo sebonoang se neng se etsahale teng ngoahola.

Default Basic Success warning Info Danger Primary

Related Posts you may like

Popular Post