Habitat Lesotho e abela Sekome ntlo

NTOMBINI SEMELLA

Lefapha la Habitat for Humanity, le ile la keteka pulo le ho nehelana ka ntlo Ha Motemekoane, Mazenod ka la 13 ‘Mesa 2018, ho ‘m’e Palesa Sekome le ba lelapa la hae, e le ba fa matla le hore ba tiee ‘moko leetong la bona la boipheliso lehaeng la bona le lecha. Ka ts'ebelisano 'moho le baithaopi ba leshome le metso e mehlano ba tsoang Habitat (Canada) mokhatlo o ile oa ahela ba ha Sekome ntlo e liphaphusi li peli ho tloha ka la 9 ho fihlela ka la 13 ‘Mesa ba boetse ba ikopantšitse le lekala la temo ho aha lentloane le tlang ho thusa lelapa ka meroho ea linako tsohle.

Sekome ea lilemo li leshome le metso e tseletseng, o lula le ausi oa hae ‘Matukule Sekome ea lilemo li mashome a mabeli a metso e mene le nkhono oa bona ‘Mamolao ea lilemo li mashome a tšeletseng a metso e mehlano. ’Me oa Palesa eena o tlalehoa a ne a hiriloe makichining koana Afrika Boroa ‘me e ne e le eena ea jereng lelapa ka ho beha letho tafoleng ha khoeli e fela.

Bophelo bo ile ba fetoha ba eba matsoelintsoeke ho Palesa le ba lelapa la habo kamor’a hore ba elelloe hore ha ba fihlelle litlhoko tsa bona tsa ho reka lithepa tsa ka tlung tsa mantlha. Lelapa la Sekome le se le ile sa tobana le qholotso e kholo ha ntlo ea bona e ene aparetsoe ke pula le moea o matla, selemong seo ‘m’e oa Palesa a hlokahetseng ka sona. Lelapa la sala le se na lehae kamor’a sekhohola seo, ho fihlelletse e mong mohaisane oa motseng a ba selila meokho ka ho ba kalima masenke a sebelitseng ho aha mok’huk’hu moo batlang ho pata hlooho teng.

Leha ho le joalo, lelapa le ne le lula le le ka har’a mesarelo nakong ea lipula le lirame kaha ho ne ho nela le masoba a kenya moea o batang haholo, ba re ba leka hona le hoane empa hose katleho e kholo. Ke hona mona moo Habitat Lesotho e ileng ea etsa pitso ho ikopanya le Morena oa motse oa Ha Motemekoane, Morena Ntšasa Ntšasa ho batla moo thuso e hlokahalang motseng oa bona joalokaha ba ne ba ile ba etsa liphuputso, ‘me ha fumaneha hore lelapa la ha Sekome le oetsoe ke leru le letšo, ka hoo ba hloka thuso. Ntsasa o re; “Ke motlotlo ho bona hore Molimo, Ralimakatso o phethile mosebetsi ona ho fihlella o ba o fela leha ba ne ba sa labella sena.”

Lehlakoreng la bookameli tl’asa Habitat, Lebohang Malijane o lebohetse basebetsi ba Habitat le ba ikopantseng ho phethela mosebetsi. O boela a supa hore ba tla nne ba ilo fihla le malapeng a mang ho tsoelapele ho thusa sechaba sa Basotho. “Re bile le pono hore e mong le mong o na le tokelo ea ho phela ka har’a lehae le bolokehileng,” ke eena eo a phethela. Sarrah Kostecki e mong oa baithaopi ho tsoa Canada, e bile e le eena motsamaisi, o re projeke ena leha e felile ba teane le liqholotso tsa pula empa ba fetse ba hlatsoana matsoho hore mosebetsi o phetheloe ka toka.

O bontšitse e le projeke ea hae ea bohlano a e entseng esale e le moithaopi kaha a qala ho tla Lesotho, mme taba e mothabisang ruri ke hore har’a li projeke tse hlano tseo ba li entseng, ena ke ea pele ea hore ba ahe e be fele, kaha baithaopi ba motse ba ile ba thusana, ‘me seo se ba ruta tšebelisano mmoho sechabeng sa Basotho. A re ba boetse ba bone bohlokoa ba ho thusa sechaba sa Basotho le hore ke sechaba se nang le thahasello.

Default Basic Success warning Info Danger Primary

Related Posts you may like

Popular Post