Mosali o tabola Lechaena 50,000

KABELO MASOABI

MASERU – Mosali ea belaelloang ka bokhosheli ba thepa ea Lechaena e balloang kaholimo ho M50,000 o ntsa tsongoa ka lintja le likatse ke mapolesa.

’Melaeloa o tlalehoa a sebetsa lebenkeleng la molli le Motse-mocha, Maseru ’me o qetetsoe ho bonoa bekeng e fetileng letsatsing leo mong’a hae a neng a bala thepa e ka setorong ho bona hore na e ntse e felletse.

Ho ea ka basebetsi ba bang ba lebenkele, ’melaeloa o bonoe a tsoa ka khoebong ka nako ea mosebetsi a jarile lehetleng mokotlana oa hae o monyane, nakong eo Lechaena le kenang ka setokising le bile le qalella ho hlahloba thepa.

Basebetsi ba supa ha sa ka hoa ba le puisano ea letho lipakeng tsa ’melaeloa le mong’a hae esita le lipakeng tsa bona le eena pele a ka kena pooneng.

Thepa e nyametseng ka lebenkeleng boholo e hlalosoa e le mabokose a neng a ts’etse lieta tsa bana ba sekolo. Pelaelo ke hore thepa e ile ea nyametsoa ka bonngoe ka nako e telele pele mong’a khoebo a ka hlokomela.

Phala ea sepolesa Superintendent Mpiti Mopeli o re ba mohlaleng oa ho qhautsa ’melaeloa haufinyane.